РФ Президенчĕн В.Путинăн хушăвĕпе килĕшÿллĕн 2019 çул Раççейре Театр çулталăкĕ. «Театр ăс панă пек нимĕнле хулăн кĕнеке те вĕрентме пултараймасть», — тенĕ Ф.Вольтер. Чăвашсен пултаруллă драматургĕ Николай Терентьевич Тереньев: „Театр вăл – ÿнер университечĕ, туйăм академийĕ“, - тенĕ.

Пирĕн чăвашсен тĕп театрĕ иртнĕ çул çĕр çулхи юбилейне паллă турĕ. Хальхи вăхăтра Чăваш Енре 6 патшалăх театрĕ, 2 уйрăм театр /камерлă тата художествăлла/, 43 халăх театрĕ ĕçлет. Декабрĕн 1-мĕшĕ тĕлне патшалăх театрĕсенче 592 çын вăй хурать /вăл шутран 287 артист/. Вĕсенчен 131-шĕ Раççей Федерацийĕн тата Чăваш Республикин хисеплĕ ячĕсене тивĕçнĕ.

Çатрассинчи вăтам шкулта Театр çулталăкне халалланă „Пĕтĕм пурнăç – театр“ уяв иртрĕ. Кашни класс  кулăшла, çав вăхăтрах ăса вĕрентекен сценкăсем хатĕрлесе сцена çинче кăтарса пачĕç. Конкурса вĕренекенсем тăрăшса хатĕрленни тÿрех курăнчĕ. 1-4 классем хушшинче иккĕмĕш классем пĕрремĕш вырăн йышăнма пултарчĕç, пĕрремĕш классем – иккĕмĕш вырăн йышăнчĕç, виççĕмĕшсемпе тăваттăмĕшсем виççĕмĕш вырăна пайларĕç. 5-8 классенче вĕренекенсем хушшинче  те хĕрÿ тупăшу иртрĕ. Ачасем хăйсене сцена çинче тытма пĕлни, сăмахсене тĕрĕс те илемлĕ калани куракансен кăмăлне кайрĕ. Вăтам классем хушшинче чи пултаруллисем – улттăмĕш классем пулчĕç, вĕсем Архип Александров çырнă „Тĕрĕс тунă“ сценка лартса пачĕç. Иккĕмĕш вырăна пиллĕкмĕш классем тухрĕç, Александр Галкинăн „Йывăр чир“ хайлавне кăтартса пачĕç. Çиччĕмĕшсем –„Каçарĕ-ши“ шÿтпе

 виççĕмĕшсем пулчĕç. Саккăрмĕш класри вĕренекенсем Валерий Михайловăн „Ватта сума су“ инсценировкине кăтартрĕç.

Жюри членĕсем чи ăста вылякансене те палăртса хăварчĕç. Вĕсем: хĕр ачасем хушшинче Анастасия Тихонова, Валерия Боярина, Карина Боярина, Ариана Григорьева, ар çын ачасем хушшинче - Максим Боярин, Марат Чабышев, Вадим Белов.