Ака уйăхĕн  28-мĕшĕнче Муркаш районĕнчи А.Николаев ячĕллĕ Калайкассинчи пĕтĕмĕшле пĕлÿ паракан вăтам шкулта  Иван Яковлевия Яковлев çуралнăранпа 170 çул тултарнине халалланă "Чăваш ачи чăвашах" фестиваль иртрĕ. 

Уява ку шкулта пĕлÿ пухакансемсĕр пуçне Муркаш районĕнчи шкулсем, Шупашкар, Комсомольски, Елчĕк районĕсеннчен тата Канаш хулинчен килнĕ хăнасем хутшăнчĕç. Фестивальте тĕрлĕ ăмăрту иртрĕ: «Вĕрентетпĕр чăвашла“ номинацире чăваш чĕлхи предметне вĕрентмен учительсем чăвашла уроксем кăтартрĕç, „Савăнатăп эп чăваш пулнишĕн“ ăмăртура – кĕçĕн классенче ăс пухакансем  чăваш халăхĕн пĕр-пĕр йăлине кăтартрĕç, „Сар каччãпа  сарă хĕр“  ăмăртура 7- 9 вĕренекенсем чăваш халăх историне, культурине, чĕлхине, йăли-йĕркине пĕлнине ăс-тăн вăййинче тĕрĕслерĕç. Пирĕн шкулта вĕренекенсем „Сар каччãпа  сарă хĕр“  тупăшăва хутшăнчĕç. Димитрий Скворцовпа Татьяна Агапова хĕрÿ тупăшу витĕр тухса пĕрремĕш вырăн çĕнсе илме пултарчĕç, дипломпа куçса çÿрекен кубока, пылак парнене (торта) тивĕçрĕç.

 „Вĕрентетпĕр чăвашла“ ăмăртăва истори вĕрентекенĕ Наталия Григорьевна Романова хутшăнчĕ. Вăл пиллĕкмĕш класра вĕренекенсемпе „Авалхи Рим тата Грек çыннисем“ ăмăрту евĕрлĕ йĕркеленĕ урока питĕ ăста кăтартрĕ. Жюри членĕсем вĕрентекен урока епле йĕркеленине, тăван халăх историйĕпе культурине урок темине çыхăнтарма пĕлнине, чăвашла тĕрĕс те таса калаçма пултарнине, тĕрлĕ меслетсемпе тата мелсемпе усă курнине, ачасене хавхалантарса ĕçлеттерме пĕлнине кура хак пачĕç. Наталия Григорьевна çак ăмăртура иккĕмĕш вырăна тухрĕ, диплома тивĕçрĕ. Эпир вĕсене саламлатпăр, малашне те çитĕнÿсем сунатпăр.