Ака уйăхĕн 11-мĕшĕнче Çатракассинчи вăтам шкулта  «Туслăх хĕлхемĕ» фестивалĕн район  тапхăрĕ  иртрĕ. Фестиваль программинче чăваш  шкулĕнче вĕренекенсем валли чăваш чĕлхипе тата культурипе ирттерекен «Çăлтăрчăк» вăйă конкурс  тата «Шевле-2017» ÿнер ăсталăхĕн конкурсĕ пулчĕ. Фестивале хутшăнакансен йышĕ  çулсерен ӳссе пыни савăнтарать.  «Çăлтăрчăк» вăйă конкурса хутшăнакансем  пилĕк станци витĕр тухрĕç:

«Чĕлхе – халăх мулĕ»

«Çут çанталăка сыхласа çын хăйне сыхлать»

«Тăван кил ăшши – атте-анне ăшши»

«Илемлĕх тĕнчи»

«Пирĕн пултарулăх».

«Шевле-2017» конкурса хутшăнакансен  шкул программине кĕртнĕ  литература хайлавĕсем тăрăх  иллюстраци хатĕрлемелле пулчĕ.

Пирĕн шкулта вĕренекенсем  ку фестивале активлă хутшăнчĕç. 8- мĕш класра вĕренекен Вероника Ерзукова «Шевле»  конкурсра иккĕмĕш вырăн йышăнма пултарчĕ, çак ятпа эпир ăна саламлатпăр.  „Çăлтăрчăк” конкурса пĕтĕмпе вун пилĕк ача хутшăнчĕ. Хĕрÿ тупăшу витĕр тухса 8-мĕш класри Анастасия Алексеева виççĕмĕш вырăна тухрĕ. Çавăн пекех кашни станцире мала тухнисене палăртрĕç.  7-мĕшĕнче ăс пухакан Димитрий Скворцов «Пирĕн пултарулăх» номинацире çĕнтерÿçĕ пулса  тăчĕ.  Çак хастар вĕренекенсене эпир саламлатпăр, малашне те хăйсен çитĕнĕвĕсемпе савăнтарасса шанатпăр.

 «Туслăх хĕлхемĕ»  фестивалĕ  пуриншĕн те  чăннипех пысăк уяв пулчĕ. Наци культурин «Туслăх хĕлхемĕ» республика фестивалĕн район тапхăрĕнчи конкурсĕсен çĕнтерÿçисене республикăра ăнăçу сунатпăр